الكلمة الأخيرة

الإسم: رضوى عبد الرحمن فودة

العمر: 28 سنة

الجنسية: مصرية

إيه ده؟: وصيتى

بسم الله الرحمن الرحيم

البوست ده مش بوست كئيب، فلو سمحتوا ما تكتئبوش، أنا شخص عندى تصالح جامد جداً مع الدار الآخرة، إن ماكانش الحاجة الوحيدة ف حياتى اللى عندى سلام تام معاها.

وعارفة إن البنى آدمين بيزعلوا من الفراق، بس اللى بيموت بيرتاح، ولازم ساعتها نفكر إن راحته أهم من أنانيتنا ف طلب بقاؤه.

لكل واحد فينا عمر مكتوب له... إحنا جايين الدنيا دى ترانزيت عشان نرجع للتراب، وكل اللى حاولت أعمله ف فترتى دى كان هدفه الأساسى إنى ابسط اللى حوالى، أو إنى أخلى الترانزيت ده فترته حلوة قدر الإمكان للناس على قد ما قدرت.

والبنى آدم مخطىء وأنا غلطت فحق ربنا ساعات، فحق ناس ساعات، فحق أهلى يمكن. ولده أنا بطلب المغفرة من كل شخص ممكن أكون أذيته. أنا فعلاً آسفة

كتير من أصحابى ومنهم أخويا كتبوا وصيتهم من سنين فاتوا.. أفتكر جه دورى.

الوصية هتتقسم: تجهيزات الرحلة، الذكرى، شغلى، ولو لى فلوس باقيه ورايا، وكلمة للصحاب والأهل والأشخاص اللى أثروا فى وعلمونى.

1- تجهيزات الرحيل والرحلة: (طبعاً أنا مش عارفة هبتدى رحلتى إزاى بس وقتما تحدث هذا ما أريده)

الناس ما تلبسش إسود (ماليش دعوة عاداتك وتقاليدك بيقولوا إيه) مافيش لبس إسود. إلبسوا أبيض وملون إنا مسافرة ورايحة عند ربنا ده شىء مفرح مش محزن.

مش عايزة عزاء، جنازة بس، لكن مافيش داعى لعزاء، لو عايز تزور أهلى زورهم يمكن عشان تحسسهم مثلا إنى ماسبتهمش لوحدهم أو أى حاجة.

(لأهلى) لكن لو لازم عزاء إتبرعوا بتمنه لناس فقراء ف الشارع، أو ساعدوا أسرة من اللاجئين أو المحتاجين. أفتكر ده أحسن.

فى الجنازة عايزاكم تنبسطولى، وتتمنوا لى إنى أعدى الرحلة دى بسلام، وإن ربنا يتقبلنى جسداً وروحاً فى الجنة ويريحنى فى قبرى ويبعتلى ونس فيه.

ملحوظة: لو جسمى فيه حاجة يمكن التبرع بيها فور وفاتى (اللى برجوا لو كانت ف مستشفى ماحدش يحطنى على جهاز تنفس صناعى أو أى وسيلة ممكن تخلينى متشعلقة كده بين الحياة والموت، لو مت أموت طبيعى) أنا بعلن إنى متبرعة بيها ليه أو ليها.

(بابا إمسك نفسك، كلنا بنموت، إنت بتنقذ ناس بعمليات التبرع دى بقالك سنين، ليه أنا مانقذهمش كمان.)

2- الذكرى: أنا شخص كان بيحب ربنا أكتر من أى حاجة فى الدنيا، وف الدنيا كنت بحب الموسيقى وكل الموسيقى الدينية من أى دين. عايزين تفتكرونى إفتكرونى بحاجة بتحبوها، وساعتها إنبسطوا وإضحكوا، بلاش كئابة عشان محدش واخد منها حاجة.

لو ماسبتش معاك أى ذكرى مادية، ونفسك ف حاجة ملموسة تفكرك بي، ممكن تطلب من أى حد من أهلى إنك تاخد شىء واحد من غرفتى هتفتكرنى بيه، أو صورة لى (ولو إن ماليش صور كتير).

المهم تفتكرنى ف الفرحة، وفى الشدة إعرف إنى برضه هحاول أسعدك لو قدرت حتى وأنا فوق.

3- شغلى: هو كان أهم حاجة ف حياتى، عشان البنى آدم من غير شغل مالوش لازمة يعيش. وأنا هكون مبسوطة لو عرفت إنى عملت حاجة من شغلى ممكن تكون ساعدت أى حد ولو حتى إنها تديله إبتسامة وأمل ف يوم سىء.

الكلمة اللى هفوتها لكل اللى بيشتغل ف التصميم/ الفن...إلخ: ربنا مديك نعمة، النعمة دى لازم تستخدمها فى مساعدة غيرك، تفك عنه كرب، تبسطه، تدافع عن حقه وحقك. إياك تستخدمها ف مصلحة ممكن تضر حد. إنت عندك مسؤولية دماغ كل شخص هيتأثر بأى حاجة هتعملها، فلو التأثير ده هيضره إياك تعملها. والمحتاجين ياما وأولهم إنت. راعى نفسك وإحترمها، وزى مابتدى شغلك إدى جسمك وروحك وعقلك راحته وثراؤه.

4- الفلوس: أى فلوس سايلة أو غير -حتى لو ربع جنيه- خرجوا بيه الغارمات. إحنا عندنا ف السجن ناس ياما عشان فلوس هايفة وقوانين أهيف وناس تافهة... خرجوهم لبيوتهم وحضن اللى بيحبوهم.

5- كلمة لكل حد بقى:

• صحاب المدرسة/ الكلية/ الشغل: شكراً :) أنا لو فى حاجة كويسة فهى عشانكم. شكراً إنكم إستحملتونى السنين اللى فاتت دى وأتمنى أكون أسعدتكم.
• ندى نشأت، ليلى فاروق وديانا يوسف: إنتوا كنتوا من أكتر الأصدقاء تأثيرا ف حياتى، ومن أنقى وأذكى الشخصيات اللى قابلتها ف حياتى. ندى، أنا آسفة على كل سخافة سخفتها عليكى، وكل رزالة عيال وأوقات فزع وغضب شفتيها منى. إنت أغلى من الكلام.
• فودة: يخرب بيت جمال أهلك، شكراً على الصداقة والأخوة والسند والحكمة وكل كبيرة وصغيرة. عايزاك تفتكرنى زى مانت عايز الناس تفتكرك، ف الفرحة. وماتعيطش عشانى، عشان إنت عارف إنى أخيراً هابقى مبسوطة. ستجدنى إن شاء الله أرفع لك كأسا من البراندى من الجنة (بهزر، براندى ف عينك!) :) وهسلم لك على كل اللى تعرفهم فوق، إحم، وربنا يكتب لى وأسلم لك على الحور العين. عايزاك تخلى بالك من شريكة حياتك وأهلك. كل أما تعمل قرشين كويسين طلع منهم حاجة صغيرة ساعد بيها حد. خلى بالك من صحتك وغذى روحك وفكرك. كون مثل جيد لولادك (وإياك تسمى حد فيهم على إسمى أنا بقول لك أهو!)
• فودة وندى نشأت: ربنا يكتب لكم السعادة والسكينة سوا دايماً ومايدخلش بينكم حد، ويحواطكم باللى يحبوكم بجد ويخليكم أنجح. إعرفوا لو لسة مع بعض إنكم هتواجهكم صعاب وتحديات ماتخطرش على بالكم، طالما حاطين هدف قدامكم إن إنتوا مع بعض وإن الثقة اللى بينكم دى ماتتهزش قصاد الجبال، وإن مافيش حاجة أهم من وجودكم ف حياة بعض، يبقى أى مشكلة هتعدى. تانى حاجة: خلى بيتكم عامر بالحب والإيمان، مارسوا الكرم والحكمة ف كل حاجة ف حياتكم، وماتناموش بالليل وإنتوا متضايقين من بعض.
• أمى وأبويا: طبعاً مش عارفة هقول إيه ولا إيه، شكراً على كل حاجة حلوة ومش حلوة علمتوهالى :) إنتوا عملتوا مجهود جبار لو كنت عشت حياتى كلها ماكنتش هعرف أعمله. بابا شكراً لكل نصيحة وصبر وعملية حضرتها، شكراً إنك كنت حاططنا هدف قدامك وكان كل حاجة بتعملها عشان تأمننا. ماما، لو لسة ماكنتش إتجوزت فأتمنى إنك تعرفى دلوقت إن ربنا ماكنش كاتبهالى، أتمنى إنك تعرفى إنى كان نفسى أكون بنت عادية زى أى بنت بتتمنى الأمانى اللى أنا دايما كنت بشوفها هابلة ومالهاش لازمة، بس عشان تبقى فخورة بى، أو عشان أحس إنى يمكن أكون عملت إنجاز ف نظرك. وعايزاكم تعرفوا إنى مسامحاكم على كل كلام مالهوش لازمة طلع ف لحظة غضب أو قلق... وأتمنى تغفرولى ذلاتى اللى لا تعد ولا تحصى. إنتوا ربيتوا أجيال من دكاترة وباحثين... ماجاتش على وهتركزوا :)
• رفاق الحقوقية والمظاهرات ولا للمحاكمات، فى داخل وخارج البلاد: أتمنى نقائكم يفضل فيكم، ماتتصدموش ف نزاهة بعض، أتمنى تخلوا حقوق الناس هى بوصلتكم، مش السياسة ولا المنصب ولا المال. لكن ماترفضوش لو ربنا رزقكم بأى حاجة من دول عشان ممكن تبقى هى دى الطريقة إنكم تحققوا للناس حياة كريمة بشكل أكفأ. إياكم والشعارات والجوفاء. إياكم وخداع بعضكم البعض. إياكم وتبرير الظلم. وإياكم والغباء والمغالاه ف الخطاب أو المناصرة، خليكوا أذكياء وإنتوا بتتعاملوا مع الناس بمختلف أنواعها.
• لو حصل المقدر وكان فيه أى ظرف حلو المفروض إنه يتعمل عند أى حد فيكم إعملوه، إن شاء الله لو عيد ميلاد، ماحدش يلغى حاجة عشانى، الحى أبقى.

ف النهاية شكراً فعلا... إدعولى وإفتكرونى ف الحاجات اللى كنا بنعملها سوا، وقربوا الدواير من بعض، وإكتشفوا بعض. فى فيكم ناس كتير ماتعرفش بعضها، إعرفوا بعض بعدى، وإكتشفوا بعض ولو ماحبتوش إختلافات بعض، على الأقل إحترموها :) بحبكم.